Հետծննդաբերական դեպրեսիան կնոջ հոգեկան առողջության տարածված մարտահրավերներից է։ Այն կարող է առաջանալ կնոջ մոտ ծննդաբերությունից հետո առաջին մեկ տարվա ընթացքում։
Հետծննդաբերական դեպրեսիայի պատճառները միանշանակ չեն, սակայն կան մի շարք գործոններ, որոնք ավելի հավանական են դարձնում դրա առաջացումը՝
– հոգեկան առողջության խնդիրների պատմություն, մասնավորապես՝ դեպրեսիա կյանքի ավելի վաղ փուլում,
– հղիության ընթացքում հոգեկան առողջության խնդիրների պատմություն,
– աջակցության բացակայություն ընտանիքի անդամների եւ ընկերների կողմից,
– դժվար հարաբերություններ զուգընկերոջ հետ,
– վերջերս տեղի ունեցած սթրեսային իրադարձություններ, ինչպիսին է մտերիմ մարդու կորուստը,
– ֆիզիկական կամ հոգեբանական տրավմա, ինչպիսին է ընտանեկան բռնությունը։
Երեխայի ծնունդը մեծ փոփոխություն է, այն կարող է դեպրեսիայի պատճառ դառնալ, եթե անգամ այս գործոններից ոչ մեկն առկա չէ։
Նշաններ, որոնք ցույց են տալիս, որ դուք կամ ձեր ծանոթը կարող է դեպրեսիա ունենալ՝
– տխրության եւ վատ տրամադրության մշտական զգացում,
– հաճույքի բացակայություն եւ հետաքրքրության կորուստ,
– էներգիայի պակաս եւ անընդհատ հոգնածության զգացում,
– քնի խանգարում եւ քնկոտության զգացում ցերեկը,
– երեխայի մասին հոգ տանելու դժվարություն,
– այլ մարդկանց հետ շփումից հրաժարվել,
– կենտրոնանալու եւ որոշումներ կայացնելու խնդիրներ,
– վախեցնող մտքեր, օրինակ՝ երեխային վնասելու մասին։
Շատ կանայք չեն գիտակցում, որ ունեն հետծննդաբերական դեպրեսիա՝ այն կարող է աստիճանաբար զարգանալ:
Ինքնօգնության 10 խորհուրդ հետծննդաբերական դեպրեսիայի համար
Լավագույն բանը, որ կարելի է անել, ինքներդ ձեր մասին հոգ տանելն է։ Հետազոտությունները ցույց են տալիս, որ շաբաթվա մեջ առնվազն մեկ անգամ ինքնախնամք իրականացնելը կարող է բարելավել մայրերի հոգեկան առողջությունը եւ նվազեցնել հետծննդաբերական դեպրեսիայի ախտանիշները։
Կարեւոր է գտնել այն փոքրիկ բաները, որոնք օգնում են ավելի լավ զգալ, սրանք կարող են ներառել ինքնօգնությամբ ապրելակերպի փոփոխությունները եւ այլ մարդկանցից օգնություն խնդրելը։
1․ Հղիության ընթացքում մշակեք աջակցության ծրագիր: Բացահայտեք, թե ինչ քայլեր եք ձեռնարկելու ճգնաժամի ժամանակ եւ ում կարող եք դիմել աջակցության համար:
2․ Ժամանակ հատկացրեք որակյալ հանգստի եւ ընդմիջում վերցնելու համար: Արեք այն, ինչից ձեզ լավ եք զգում, եւ ինչը բարձրացնում է ձեր ինքնավստահությունը:
3․ Կիսվեք ձեր զգացմունքներով որեւէ մեկի հետ։ Սա կարող է բարելավել ձեր ինքնազգացողությունը:
4․ Ապավինեք ձեր զուգընկերոջը, ընտանիքին եւ ընկերներին: Նրանց աջակցությունը մեծ դեր կարող է ունենալ ձեր վերականգնման գործում: Տեղեկացրեք նրանց, թե ինչպես եք ցանկանում, որ ձեզ աջակցեն:
5․ Ձեր հարաբերությունները դարձրեք առաջնահերթություն: Ժամանակ անցկացրեք նրանց հետ, ում սիրում եք, սա կբարձրացնի ձեր տրամադրությունը:
6․ Հոգ տարեք քնի մասին: Չնայած դա դժվար է նորածինների հետ, լավ գիշերային քունը կարող է նշանակալի դրական ազդեցություն ունենալ ձեր տրամադրության եւ էներգիայի մակարդակի վրա:
7․ Սնունդը դարձրեք առաջնահերթություն: Այն, ինչ ուտում եք, ազդում է ձեր տրամադրության վրա։ Համոզվեք, որ ստանում եք բավարար քանակությամբ սննդանյութեր եւ վիտամիններ:
8․ Դուրս եկեք տնից: Սա կարող է ձեզ որոշակի հեռանկար եւ ժամանակ տալ, որպեսզի ձեր մարմինը եւ ուղեղը «շնչեն»:
9․ Կատարեք վարժություններ, սա չափազանց արդյունավետ է դեպրեսիայի հաղթահարման համար:
10․ Խոսեք այլ մայրերի հետ: Կարեւոր է լսել եւ իմանալ, որ այլ մայրեր կիսում են ձեր մարտահրավերները, նրանք կարող են արդյունավետ հուզական աջակցության միջավայր ստեղծել: